Մեկնարկել է «Գթության խոհանոց» ծրագրի 33-րդ շրջանը. Ավինյան

«Գթության խոհանոց» ծրագիրը մեկնարկել է 33-րդ անգամ․ նախաձեռնությունը շարունակում է աջակցել կարիքավորներին: Այս մասին իր Ֆեյսբուքյան էջում գրել է Տիգրան Ավինյանը:
Մանրամասն գրառումը ստորև.
«Մեկնարկել է «Գթության խոհանոց» ծրագրի 33-րդ շրջանը։

Ավելի քան երեք տասնամյակ այս նախաձեռնությունը Երևանի հարյուրավոր բնակիչների կողքին է՝ ամենօրյա տաք սննդով, տնային այցելություններով ու դժվար պահին անհրաժեշտ օգնությամբ։

Գերհարդ Մայեռի հիմնադրած գործն այսօր շարունակում է «Հուսո տուն» բարեգործական կենտրոնը՝ տնօրեն Մովսես Պողոսյանի և իր թիմի ջանքերով։
Նրանք հոգ են տանում միայնակ տարեցների մասին, աջակցում ընտանիքներին ու երեխաների համար ստեղծում սովորելու և զարգանալու հնարավորություններ։

Մովսես Պողոսյանին՝ շուրջ 30 տարվա նվիրված աշխատանքի համար, պարգևատրեցի «Էրեբունի-Երևան 2800» մեդալով։
Շնորհակալ եմ նրան, մեր գերմանացի բարեկամներին, բարերարներին ու կամավորներին։

Երևանի քաղաքապետարանը ձեր կողքին է։ Ուժ ու եռանդ եմ մաղթում՝ այս կարևոր գործը շարունակելու համար»,-գրել է Ավինյանը։