Մենք բաց և հստակ արտահայտել ենք մեր մտահոգությունները TRIPP նախագծի հնարավոր սցենարների առնչությամբ. Շիրղոլամի

«Մենք բաց և հստակ արտահայտել ենք մեր մտահոգությունները TRIPP նախագծի հնարավոր սցենարների առնչությամբ։ Միևնույն ժամանակ վստահ ենք, որ կառուցողական մթնոլորտում կկարողանանք համատեղ կառավարել այս առումով ցանկացած մարտահրավեր»։ Այս մասին լրագրողների հետ զրույցում այսօր հայտարարել է Հայաստանում Իրանի արտակարգ և լիազոր դեսպան Խալիլ Շիրղոլամին։

Նա նաև նշել է, որ կարևոր է, որ TRIPP նախագծի կամ ցանկացած այլ հարցի քննարկման ընթացքում հարգվեն Հայաստանի տարածքային ամբողջականությունն ու ազգային ինքնիշխանությունը։ «Կարևոր է նաև, որ որևէ երրորդ կողմ չկարողանա մարտահրավերներ ստեղծել Հայաստանի և Իրանի միջև ռազմավարական հարաբերությունների համար։ Մենք հավատարիմ ենք մնալու այս մոտեցմանը երկու երկրների միջև քննարկումների և հետագա աշխատանքների ընթացքում»,- նշել է Շիրղոլամին։

Ըստ դեսպանի, Իրանը ցանկանում է ստեղծել ձևաչափ, որի շրջանակում հնարավոր կլինի քննարկումներ անցկացնել Հայաստանի հետ։ Դիվանագետի համոզմամբ՝ դա կօգնի ցանկացած խնդիր ի հայտ գալուն պես արագ լուծել։

Նա նաև նշել է, որ նախագծի տեխնիկական հարցերը քննարկման փուլում են, և կարևոր է, թե դրա իրականացման ընթացքում ինչ մեխանիզմներ են կիրառվելու, քանի որ հենց այդ մեխանիզմների հիման վրա են ձևավորվում երաշխիքները, որ նախագծի շրջանակում կպահպանվեն Հայաստանի տարածքային ամբողջականության և ազգային ինքնիշխանության սկզբունքները։

«Հենց այս մեխանիզմները պետք է երաշխավորեն, որ չի ստեղծվի որևէ միջանցք, որը դուրս կլինի երկրի իրավազորությունից։ Կարևոր են նաև երաշխիքները, որ նախագծի շրջանակում օտարերկրյա ուժեր ներգրավված չեն լինի։ Հուսով ենք՝ կառավարությունն այս մեխանիզմները մշակելիս ցուցաբերելու է զգոն և զգուշավոր մոտեցում՝ ի շահ Հայաստանի»,- եզրափակել է դեսպանը։

Այս թեմայով ԱԺ «Ուժեղ Հայաստան» խմբակցության ղեկավար Նարեկ Կարապետյանը Կանադայի դեսպանի հետ քննարկել է Հայաստանի ու Ադրբեջանի միջև խաղաղության հաստատման գործընթացը ԱՄՆ-ում ՀՀ դեսպանը ներկայացրել է Հայաստանի ներդրումային հնարավորությունները Նիգերիայի նորանշանակ դեսպան Մոհամմադ Համզա Սալլաուին իր հավատարմագրերի պատճեններն է հանձնել ՀՀ ԱԳՄԱ նախարարի տեղակալին Անի Ավետիսյանին ՀՀ ֆինանսների նախարարն ընդունել է ՀՀ-ում Ֆրանսիայի նորանշանակ դեսպանին ՀՀ դեսպանն ու Ֆրանս-Հայկական առևտրաարդյունաբերական պալատի (CCIFA) նախագահը քննարկել են արտահանման խթանումը