Չիտայի ռազմական դատարանը ազգությամբ հայ երիտասարդին սոցիալական ցանցերում կատարած մեկնաբանությունների համար դատապարտել է 9,5 տարվա ազատազրկման

Ռուսաստանի 2-րդ Արևելյան օկրուգային ռազմական դատարանը երկքաղաքացի  Գևորգ Գրիգորյանին դատապարտել է 9 տարի 6 ամիս ժամկետով ազատազրկման՝ ընդհանուր ռեժիմի գաղութում։ Երիտասարդը մեղադրվում էր սոցիալական ցանցերում կատարած մեկնաբանությունների համար։ 

23-ամյա Գևորգ Գրիգորյանը բնակվել է Անդրբայկալյան երկրամասում և ունի Ռուսաստանի ու Հայաստանի քաղաքացիություն։ Նա դատապարտվել է ռազմական գործողությունների վերաբերյալ կեղծ տեղեկություններ տարածելու, նացիզմը արդարացնելու, ինչպես նաև «ահաբեկչության» և «ծայրահեղականության» կոչեր հնչեցնելու մեղադրանքներով։

ArmRus.info-ի  զրուցակցի խոսքով՝ Գրիգորյանը ձերբակալվել և 2025 թվականի հունիսին տնային կալանքի է ուղարկվել։ Քրեական գործի հարուցման պատճառ են դարձել հայկական տեղեկատվական հարթակներում հրապարակված հակառուսական մեկնաբանությունները։ Դրանցում նա գրել էր, որ «Հիտլերը պետք է բոլորին ոչնչացներ» կամ որ «Ուկրաինայից հետո ռուսական զորքերը կմտնեն Հայաստան»։

Գրիգորյանի ծանոթի խոսքով երիտասարդը նման մեկնաբանություններ էր թողել՝ զայրացած լինելով այն հանգամանքից, որ 2023 թվականին Լեռնային Ղարաբաղի համար պատերազմի ընթացքում Ռուսաստանը չօգնեց Հայաստանին։

Գրիգորյանի ձերբակալության վերաբերյալ Քննչական կոմիտեի տարածած հաղորդագրության մեջ պնդվում էր, որ նա հրապարակել է «վիրավորական ձևակերպումներ պարունակող մեկնաբանություններ», ինչպես նաև «բացահայտ աջակցել է նացիզմի գաղափարախոսությանը»։

Սկզբում Գրիգորյանին մեղադրանք էր առաջադրվել միայն նացիզմի արդարացման և ատելության հրահրման հոդվածներով։ Նախատեսվում էր, որ նրա գործը կքննի Չիտայի Կենտրոնական շրջանային դատարանը։ Սակայն ժամանակի ընթացքում գործին նոր մեղադրանքներ են ավելացվել, և 2026 թվականի օգոստոսին այն փոխանցվել է օկրուգային ռազմական դատարան։

Այնուամենայնիվ, մեղադրանքի խստացումից հետո անգամ, ըստ մեղադրյալի ծանոթի, Գրիգորյանը մնացել է տնային կալանքի տակ և չի տեղափոխվել քննչական մեկուսարան (СИЗО)։

Այդ պատճառով նրա հարազատները շարունակում էին հույս ունենալ, որ երիտասարդին կհաջողվի խուսափել իրական ազատազրկումից։ Նույնիսկ այն ժամանակ, երբ պետական մեղադրողը նրա համար պահանջել էր 10 տարվա ազատազրկում։

Գևորգի ծանոթի խոսքով՝ երիտասարդն ընդունել է իր մեղքը և զղջացել կատարածի համար։