Միջադեպ Երուսաղեմի հայկական Սրբոց Հակոբյանց վանքի մուտքի մոտ

Երեքշաբթի երեկոյան՝ Իսրայելում խորհրդարանական ընտրությունների օրը, Երուսաղեմում մի տղամարդ թքել է Հայկական թաղամասում գտնվող Սրբոց Հակոբյանց վանքի մուտքին և վիրավորել իրեն նկատողություն արած հայ պահակին։ Ըստ Zartonk Media-ի, տեսահսկման տեսախցիկների տեսագրությունը հրապարակել է երուսաղեմահայ լրագրող Գեղամ Բալյանը։
Նշենք, որ Սրբոց Հակոբյանց վանքը Երուսաղեմի Հայոց պատրիարքության նստավայրն է և հայոց պատրիարքի կեցավայրը։ Սա օգոստոսից ի վեր վանքի մուտքի նկատմամբ հարձակման արդեն երրորդ փաստագրված դեպքն է։

Հավելենք, Երուսաղեմի Հին քաղաքում հալածանքների ծավալն արտացոլված է Կրոնական ազատության տվյալների կենտրոնի (RFDC)՝ այս ամիս հրապարակված զեկույցում։ 2026 թվականի հուլիսից սեպտեմբերն ընկած ժամանակահատվածում կազմակերպությունը 96 միջադեպի շրջանակում փաստագրել է ճնշումների 106 դրսևորում։ Հին քաղաքում գրանցված 77 միջադեպից 45-ը տեղի է ունեցել Հայոց պատրիարքության փողոցում՝ Հայկական թաղամասի հենց կենտրոնում։ Արձանագրված 106 դրսևորումից 77-ը թքելու դեպքեր են եղել։

Հավելենք նաև, որ Երուսաղեմի հայ համայնքի պատմությունը սկսվում է IV դարից, և այն 1700 տարի շարունակ անընդմեջ ներկայություն է ունեցել Սուրբ երկրում։ Սա Հայաստանի սահմաններից դուրս գործող ամենահին հայ համայնքն է։ Այսօր Երուսաղեմում շուրջ երկու հազար հայ է ապրում. 1948 թվականից ի վեր համայնքի թվաքանակը զգալիորեն նվազել է։