Նոյեմբերի 11-ին ՀԱՊԿ-ի սեղանին կարող է հայտնվել Հայաստանի հարցը․ Երևանի քաղաքական ուղերձներն ու ներքին աղմուկը

 Նոյեմբերի 11-ին Մոսկվայում կայանալիք ՀԱՊԿ Հավաքական անվտանգության խորհրդի նիստը կարող է կարևոր շրջադարձային նշանակություն ունենալ Հայաստանի և կազմակերպության հարաբերություններում։ ՀԱՊԿ գլխավոր քարտուղար Թաալաթբեկ Մասադիկովը հայտարարել է, որ Հայաստանի անդամակցության հարցը կարող է ներառվել նիստի օրակարգում, և այդ դեպքում կարող է համապատասխան որոշում կայացվել։  Սա արդեն պարզապես դիվանագիտական հայտարարություն չէ։ Հայաստանի իշխանությունները մի կողմից հայտարարում են ՀԱՊԿ-ին մասնակցությունը չվերականգնելու մասին, մյուս կողմից շարունակում են քաղաքական հռետորաբանությունը, որը պարբերաբար նոր լարվածություն է առաջացնում հայ-ռուսական հարաբերություններում։

Սարիկ Մինասյանի հայտարարությունը, թե ռուսական 102-րդ ռազմաբազան Թուրքիայի հետ հնարավոր պատերազմի դեպքում ընդամենը 20 րոպե կարող է դիմակայել, կարծես սպասված քաղաքական աղմուկը չբարձրացրեց,իսկ  իշխանական շրջանակները կարծես չեն պատրաստվում կանգ առնել։ 

Հիմա էլ հանրությանն առավելապես ֆեյքային ակտիվությամբ հայտնի Տարոն Չախոյանին են ուղարկում Պետրոս Ղազարյանի հաղորդմանը, պետական հեռուստաընկերության եթերից հերթական քաղաքական ուղերձները հնչեցնելու։ Չախոյանը մատ է թափ տալիս ռուսական ռազմաբազայի վրա և հավաստիացում,  թե եթե ռուսին պետք է ,թող վերանայի պայմանները։ Առևտուր են անում , թե՞... 

Այստեղ բնական հարց է առաջանում․ երբ նոյեմբերի 11-ին Մոսկվայում կարող է քննարկվել Հայաստանի անդամակցության հարցը, ինչո՞ւ է պաշտոնական Երևանը շարունակում այնպիսի քաղաքական և տեղեկատվական հռետորաբանությունը, որը նոր լարվածություն է ստեղծում հարաբերություններում։

Եթե իշխանությունը ՀԱՊԿ-ից հեռանալու քաղաքական որոշում ունի, դա մեկ հարց է։ Բայց միանգամայն այլ հարց է արդյո՞ք Հայաստանը պատրաստ է այդ որոշման բոլոր հնարավոր հետևանքներին։

Նոյեմբերի 11-ը կարող է ցույց տալ, թե այս ամբողջ քաղաքական հակադրությունը որքանով է վերածվելու կոնկրետ որոշումների։ Իսկ մինչ այդ Հայաստանի ներսում շարունակվում է փոխադարձ մեղադրանքների, սադրիչ հայտարարությունների և տեղեկատվական հակամարտության շղթան։

Խնդիրը միայն այն չէ, թե ինչ կասեն Մոսկվայում։ Խնդիրն այն է, թե ինչ գնով է Հայաստանը հասնելու իր հայտարարած արտաքին քաղաքական նպատակներին։ 

Արմինե Մելքոնյան