Թուրքիան կպահպանի իր ռազմական ներկայությունը Սիրիայում և Իրաքում

Թուրքիան կպահպանի իր ռազմական ներկայությունը Սիրիայում և Իրաքում այնքան ժամանակ, քանի դեռ չի ապահովվել նրա սահմանների անվտանգությունը այդ երկու երկրի հետ։ Դրա մասին AFP գործակալության հարցերին գրավոր պատասխանում հայտարարել է Թուրքիայի պաշտպանության նախարար Յաշար Գյուլերը։

«Մենք պահպանում ենք մեր ռազմական ներկայությունը Իրաքում և Սիրիայում։ Երբ համարենք, որ տարածաշրջանային անվտանգության և սահմանների անվտանգության տեսանկյունից անհրաժեշտ պայմանները կատարված են, մեր բազաների և տարածաշրջանում մեր ներկայության կարգավիճակը կվերանայվի»,- հայտնել է թուրք նախարարը։

Նշենք, որ Թուրքիան երկար տարիներ զորքեր է տեղակայում Սիրիայի և Իրաքի հյուսիսում՝ ձգտելով կանխել Թուրքիայում արգելված Քուրդիստանի աշխատավորական կուսակցության (ՔԱԿ) և «Իսլամական պետություն» (ԻՊ) խմբավորման զինյալների կողմից բխող սպառնալիքները։

Իրավիճակը, սակայն, փոխվել է Սիրիայում Բաշար Ասադի ռեժիմի տապալումից և Անկարայի հետ համագործակցությանն ուղղված կառավարության իշխանության գալուց հետո։
Գյուլերի կարծիքով, Թուրքիան անվտանգության ոլորտում սերտորեն համագործակցում է սիրիական նոր իշխանությունների հետ, իսկ թուրք զինվորականներն օգնում են ամրապնդելու սիրիական բանակի հնարավորությունները և ապահովել սահմանների անվտանգությունը։
«Երբ տարածաշրջանում ահաբեկչական սպառնալիքը լիովին վերացվի, սահմանների անվտանգությունն ապահովվի, իսկ պետական իշխանությունը առանց բացառության և ամբողջ ծավալով հաստատվի Սիրիայի ամբողջ տարածքում, մեր ուժերի կարգավիճակը կվերանայվի»,- իր խոսքում նշել է պաշտպանության նախարարության ղեկավարը։

Հիշեցնենք, որ Թուրք զինվորականներն Իրաքում են 2015 թվականից և պարբերաբար իրականացնում են սահմանանց գործողություններ ու ավիահարվածներ ՔԱԿ-ի դիրքերի ուղղությամբ։ Իրաքյան անվտանգության ոլորտի աղբյուրի տվյալներով՝ այնտեղ այժմ տեղակայված է 800-1000 թուրք զինծառայող։ Նրանց ներկայությունը շարունակում է մնալ Անկարայի և Բաղդադի հարաբերություններում լարվածության գործոններից մեկը։