Մակրոնն ԱՄԷ-ից ամսական 100 հազար տոննա վառելիք մատակարարելու «պարտավորության» երաշխիք է ստացել. AFP

Ֆրանսիայի նախագահ Էմանուել Մակրոնը Մերձավոր Արևելքի երկրներ կատարած այցի ընթացքում մտադիր է պայմանավորվածություն ձեռք բերել Արաբական Միացյալ Էմիրություններից (ԱՄԷ) և Բահրեյնից ամսական 200 հազար տոննա դիզելային վառելիքի մատակարարման շուրջ։ Այս մասին, հղում անելով Ելիսեյան պալատին
հայտնել է AFP գործակալությունը։

Աղբյուրի տվյալներով՝ Մակրոնն ԱՄԷ-ից ամսական 100 հազար տոննա վառելիք մատակարարելու «պարտավորության» երաշխիք է ստացել։ Եվս 100 հազար տոննայի մատակարարումը նա ակնկալում է համաձայնեցնել օրվա երկրորդ կեսին՝ Բահրեյն կատարելիք այցի ընթացքում։ Հաշվի առնելով Սաուդյան Արաբիայի արդեն խոստացած լրացուցիչ ծավալները (հոկտեմբերին և նոյեմբերին՝ 95-ական հազար տոննա)՝ Ֆրանսիան ապահովել է ամսական 295 հազար տոննա դիզելային վառելիքի մատակարարման պարտավորություն։ Դա կազմում է երկրի ընդհանուր սպառման շուրջ 10%-ը, ինչը, Ելիսեյան պալատի պնդմամբ, պետք է թույլ տա նվազեցնել գները լցակայաններում։

Հավելենք, որ ավելի վաղ AFP-ն, հիմնվելով Եվրամիության վիճակագրության վերլուծության վրա, հայտնել էր, որ հոկտեմբերի 1-ին ԵՄ-ում գրանցվել էր դիզելային վառելիքի գնի նոր բացարձակ ռեկորդ. մեկ լիտրի միջին արժեքը հասել էր 2,24 եվրոյի։

Այս թեմայով Միացյալ Նահանգներ դիզվառելիքի մատակարարման հետ կապված բոլոր հարցերն արդեն լուծված են. Նովակ