Մոսկվայում նշվեց Հայոց գրերի օրը

Մոսկվայի ՎԴՆԽ-ի հայկական տաղավարում այսօր տեղի ունեցավ Հայոց գրերին  նվիրված միջոցառում, որի գլխավոր ուղերձը հայկական ինքնության պահպանումն էր հայրենիքից հեռու։ Միջոցառման առանցքում հայ մնալու, ազգային արմատները պահպանելու, մայրենի լեզուն, մշակույթն ու ավանդույթները հաջորդ սերունդներին փոխանցելու գաղափարն էր։

ՌԴ հայերի միության ջանքերով կազմակերպված միջոցառմանը ներկա էին բազմաթիվ հյուրեր  տարբեր երկրներից, ինչպես բարձրաստիճան պաշտոնյաներ, այնպես էլ այլազգի մշակութային գործիչներ։ 

Միջոցառումը մեկ հարկի տակ էր համախմբել մարդկանց, որոնց միավորում են հայկական ծագումը, մշակույթն ու ազգային արժեքների պահպանման կարևորությունը։ Միջոցառման ընթացքում հնչեցին հայկական երգեր, թևածեցին ազգային պարերը հայկական մշակույթը ներկայացնելով իր ողջ պերճանքով և հնչեղությամբ։

Առանձին ուշադրության արժանացան նաև Մոսկվայի հայկական դպրոցները․ նրանց ներկայացուցիչներին հանձնվեցին շնորհակալագրեր հայապահպանության, մայրենի լեզվի և ազգային կրթության գործում ունեցած ավանդի համար։

Միջոցառումը ևս մեկ անգամ ընդգծեց մի կարևոր գաղափար՝ հայրենիքը միայն աշխարհագրական տարածք չէ։ Այն լեզուն է, մշակույթը, հիշողությունն ու ինքնությունը, որոնք հայը կրում է իր հետ  աշխարհի որ անկյունում էլ լինի։

Եվ քանի դեռ հնչում է հայերենը, պահպանվում են հայկական դպրոցն ու երգը, շարունակվում է նաև հայկականությունը  հայրենիքից հազարավոր կիլոմետրեր հեռու։

Արմինե Մելքոնյան