Ովքե՞ր են Հայաստանում այդքան անշարժ գույք գնում

Հայաստանի անշարժ գույքի շուկայում գնորդների կազմը հարցեր է առաջացնում։ Ովքե՞ր են այն մարդիկ, ովքեր Հայաստանում բնակարաններ, տներ և այլ անշարժ գույք են ձեռք բերում, և ինչի՞ հաշվին է ձևավորվում այդ պահանջարկը։ Օր օրի աճող գները խոսում են բարձր պահանջարկի մասին։

ՀՀ վիճակագրական կոմիտեի 2025 թվականի տվյալներով, օտարերկրյա քաղաքացիները Հայաստանում ձեռք են բերել 2 014 միավոր անշարժ գույք։

Օտարերկրյա գնորդների շարքում բացարձակ առաջատար են Ռուսաստանի քաղաքացիները՝ 1 262 բնակարան։ Սա օտարերկրացիների կողմից ձեռք բերված ամբողջ գույքի շուրջ 63 տոկոսն է։

ԱՄՆ քաղաքացիները գնել են 217 միավոր, եվրոպական երկրների քաղաքացիները 261, ԱՊՀ այլ երկրների քաղաքացիները 131, Իրանի քաղաքացիները 58, իսկ այլ երկրների քաղաքացիները 85 միավոր անշարժ գույք։

Միևնույն ժամանակ, Կադաստրի կոմիտեի հրապարակած տվյալների համաձայն՝ 2025 թվականին օտարերկրյա քաղաքացիները Հայաստանում գնել են 2 014, իսկ վաճառել 2 524 միավոր անշարժ գույք։ Այսինքն՝ վաճառքների թիվը 510-ով գերազանցել է գնումներին։ 

2026 թվականի երրորդ եռամսյակի տվյալներով՝ օտարերկրացիները գնել են ևս 810 միավոր անշարժ գույք։ 

Բայց այս վիճակագրությունը պատասխանում է միայն օտարերկրյա գնորդների մասին հարցին։ Իսկ ո՞վ է գնում Հայաստանում մնացած անշարժ գույքը։

Որքա՞ն բնակարան է ձեռք բերվում ՀՀ քաղաքացիների կողմից, քանի՞ գործարք են իրականացնում իրավաբանական անձինք, արդյո՞ք կան ընկերություններ կամ անհատներ, որոնք միանգամից տասնյակ բնակարաններ են գնում, և ինչպե՞ս է ֆինանսավորվում այդ գնումը։

Սրանք հարցեր են, որոնց պատասխանները կարող են շատ ավելի ամբողջական պատկեր տալ Հայաստանի անշարժ գույքի շուկայի մասին։

Չար լեզուներն ասում են, որ բնակարաններ շատ են ձեռք բերում նաև Թուրքիայի քաղաքացիներ, պարզապես նրանք գործարքը կատարում են ծանոթ հայերի անձնագրերով։ 

Այդուհանդերձ գլխավոր հարցը մնում է բաց․ Հայաստանում անշարժ գույքի շուկան ո՞ւմ համար է դարձել ներդրման միջոց, և ո՞վ է իրականում ձևավորում այդ պահանջարկը։ 

Եվ ինչո՞ւ են մայրաքաղաքը դարձնում հասանելի օտարերկրացիներին, իսկ քաղաքի բնակիչների կյանքը դարձնում անտանելի։

Արմինե Մելքոնյան