Ինչո՞ւ Ադրբեջանից փոխադարձ չեն պահանջում Սահմանադրության փոփոխություն, երբ Ադրբեջանը ևս ունի տարածքային հավակնություններ

Ադրբեջանը շարունակում է խաղաղության պայմանագրի ստորագրման նախապայման դարձնել Հայաստանի Հանրապետության Սահմանադրության փոփոխությունը, պահանջելով վերացնել Անկախության հռչակագրին վերաբերող հղումը։ Բաքվի հիմնավորումն այն է, թե այդ հռչակագիրը տարածքային հավակնություններ է պարունակում Ադրբեջանի նկատմամբ։

Բայց այդ դեպքում հարց է առաջանում՝ ինչո՞ւ նույն պահանջը չի ներկայացվում Ադրբեջանին։

Եթե Հայաստանի Հանրապետության Սահմանադրությունն ուզում են խմբագրել, հանելով Հայաստանի Անկախության հռչակագրին վերաբերող հղումը, ապա նույն տրամաբանությամբ պետք է խմբագրվի նաև Ադրբեջանի Սահմանադրությունը, հանելով Ադրբեջանի Անկախության հռչակագրին վերաբերող հղումը, որի պատմական ձևակերպումները ադրբեջանական քաղաքական դաշտում կապվում են նաև այսպես կոչված «Արևմտյան Ադրբեջանի» գաղափարի հետ։

«Արևմտյան Ադրբեջան» եզրույթը վերաբերում է Հայաստանի Հանրապետության ինքնիշխան տարածքին և ադրբեջանական քաղաքական խոսույթում օգտագործվում է այդ տարածքի նկատմամբ պատմական վերադարձի պահանջների համատեքստում։ Ինչո՞ւ Հայաստանի պատմական փաստաթղթերի հղումները Բաքուն դիտարկում է որպես տարածքային հավակնություն, իսկ Ադրբեջանի պատմական փաստաթղթերն ու «Արևմտյան Ադրբեջանի» գաղափարը նույն չափանիշով չեն գնահատվում։

Ստացվում է Նիկոլ Փաշինյանը խաղաղության գործընթացի համար սպառնալիք համարում է միայն Հայաստանի Սահմանադրությունը, իսկ իր լսարանը պատկերացում անգամ չունի, թե իրականում ում շահերն է առաջ մղում Փաշինյանը։

Խաղաղությունը չի կարող լինել միակողմանի զիջումների գործընթաց։ Եթե Հայաստանից պահանջվում է վերանայել իր իրավական փաստաթղթերը, ապա նույն պահանջը պետք է ներկայացվի նաև Ադրբեջանին։ Հակառակ դեպքում ստացվում է, որ տարածքային հավակնությունների բացառման սկզբունքը գործում է միայն Հայաստանի համար։

Արմինե Մելքոնյան