Albayrak Media-ի կազմակերպած «Թուրքիայի դարը տրանսպորտի և ենթակառուցվածքների ոլորտում» գագաթնաժողովում ելույթ ունենալով՝ Ուրալօղլուն խոսել է երկրի երկաթուղային ցանցի զարգացման մասին և նշել, որ Կարս -Իգդիր- Արալըք հատվածում աշխատանքները շարունակվում են։

Ըստ թուրք նախարարի՝ այս գիծը ռազմավարական նշանակություն ունի արևելյան ուղղությամբ Թուրքիայի երկաթուղային կապերի ամրապնդման համար։ Նախագիծը պետք է ապահովի Թուրքիայի տրանսպորտային ցանցի ելքը դեպի Նախիջևան՝ Դիլուջու սահմանային անցակետով, և հետագայում նպաստի Թուրքիայի, Ադրբեջանի և Հայաստանի միջև հաղորդակցության զարգացմանը։

Ուրալօղլուն հայտնել է նաև, որ Թուրքիայի գործող երկաթուղային ցանցի երկարությունը հասել է մոտ 14 հազար կիլոմետրի, որից 2251 կիլոմետրը բաժին է ընկնում արագընթաց գնացքների գծերին։ Եվս շուրջ 4800 կիլոմետր նոր արագընթաց երկաթուղիներ գտնվում են շինարարության փուլում։ Դրանցից մոտ 3000 կիլոմետրը նախատեսվում է ավարտել մինչև 2028 թվականը։

Ուրալօղլուն հայտարարել է, որ Թուրքիան մտադիր է շարունակել երկաթուղային ենթակառուցվածքի ընդլայնումը՝ այդ թվում հաշվի առնելով դրա դերը տարածաշրջանային տրանսպորտային երթուղիներում։

Մինչև 2053 թվականը Թուրքիայի իշխանություններն ակնկալում են երկրի երկաթուղային ցանցի ընդհանուր երկարությունը հասցնել 28 հազար 500 կիլոմետրի։ Ըստ Ուրալօղլուի՝ Թուրքիան նաև նպատակ է դնում ապահովել երկիրը երկաթուղով 48 ժամում հատելու հնարավորությունը։