Չվախենալու կոչ անող Աննա Հակոբյանը վախենում է բաց պահել սեփական գրառման մեկնաբանությունները

Քիչ առաջ սոցիալական ցանցերում վարչապետի տիկին Աննա Հակոբյանը տեսանյութ է տեղադրել՝ «Չվախենալու մասին»։ Չվախենալու կոչ անող Աննա Հակոբյանը զարմանում է, թե ինչու են մարզերում «բոլորը բոլորից վախենում», բայց այդ զարմանքը մի փոքր անհամոզիչ է հնչում, երբ երկրի իրականությունից ընդամենը մի քանի քայլ հեռու մարդկանց աշխատանքից ազատելու, քաղաքական հայացքների համար ճնշումների և այլակարծության հանդեպ անհանդուրժողականության մասին կոնկրետ հրապարակումներ կան։

Վերջինս շտապում է խոսել ՏԻՄ ընտրություններից և անպայման որակում տալ՝ պնդելով, թե ընդդիմադիր քաղաքական ուժերը վախից կաշառք են բաժանում։ Բայց զարմանքը գուցե հավակներ իրականություն լինել, եթե չլիներ «երկրի հակառակ կողմի» իրական պատկերը։

Կաշառակերության մասին խոսում են նրանք, ովքեր ընտրություններից առաջ ներդրեցին առողջապահական ապահովագրության համակարգը, թոշակները բարձրացրին 10 000 դրամով և անպայման հիշեցին նաև մանկապարտեզների աշխատողների աշխատավարձերի վերանայման մասին։

Բայց դե կաշառակերությունը մի կողմ, վախը՝ մի այլ կողմ։

Վախի նժարի վրա դրված են մարդիկ, ովքեր ընդամենը օրեր առաջ «Ուժեղ Հայաստան» կուսակցության ղեկավարի հետ լուսանկարվելու պատճառով ազատվել են բուժքրոջ աշխատանքից։

Մարդ, ով ԱԺ ընտրությունների օրերին Նիկոլ Փաշինյանի երեսին ճշմարտությունն ասելու պատճառով ազատվեց բժշկուհու աշխատանքից։ Հա, ի դեպ, պատճառաբանությամբ, թե հաստիքը կրճատվել է։

Մարդիկ, ովքեր ավանի մարզադպրոցում ենթարկվում են հոգեբանական բռնության Լևոն Քոչարյանի հետ լուսանկարվելու համար։

Այդ վախեցող մարդկանց շարքը շարունակվում է դպրոցներում ուսուցիչներին ահաբեկելով և ավարտվում ուժային կառույցներում հակառակ մտածող մարդկանց նկատմամբ ագրեսիայով։

Բայց այս ամենի ֆարսը մի պահ նաև զավեշտի է վերածվում, երբ նկատում ես, որ ինքը՝ Աննա Հակոբյանը, ևս վախեցած է, այլապես սոցցանցերում ինչո՞ւ է փակում մեկնաբանություններ գրելու հնարավորությունը... 

Նյութը ` Արմինե Մելքոնյանի