ՌԴ-ն հույս ունի, որ ՄԱԿ-ի գլխավոր քարտուղարի ընտրությունը քարտուղարությանը կազատի Արևմուտքի թելադրանքից

Ռուսաստանը հույս ունի, որ ՄԱԿ-ի նոր գլխավոր քարտուղարի ընտրությունը համաշխարհային կազմակերպության քարտուղարությանը կազատի Արևմուտքի թելադրանքից և «գործարքներից կուլիսների հետևում»։ Այս մասին հայտարարել է ՌԴ ԱԳՆ միջազգային կազմակերպությունների դեպարտամենտի տնօրեն Կիրիլ Լոգվինովը՝ ՄԱԿ-ի օրվա կապակցությամբ։

«ՄԱԿ-ի գործունեության լուրջ խնդիրները չի կարելի անտեսել։ Անհրաժեշտ է առավելագույն ջանքեր գործադրել՝ կազմակերպության աշխատանքում կոլեգիալության ոգին վերականգնելու, կանոնադրության սկզբունքների ամբողջական և փոխկապակցված պահպանությունն ապահովելու, ՄԱԿ-ի մեխանիզմները ժամանակակից բազմակենտրոն իրողություններին հարմարեցնելու, կուլիսային պայմանավորվածությունների փոխարեն ազնիվ և փոխադարձ հարգանքի վրա հիմնված երկխոսություն հաստատելու, Գլոբալ հարավի ձայնն ուժեղացնելու և քարտուղարությունն Արևմուտքի թելադրանքից ազատելու համար։ Այս առումով առանձնահատուկ հույսեր ենք կապում ՄԱԿ-ի նոր գլխավոր քարտուղարի ընտրության հետ»,- գրել է դիվանագետը Telegram-ի իր ալիքում։

Լոգվինովն ընդգծել է, որ ՄԱԿ-ն ապրում է «խոր համակարգային ճգնաժամ»։

«Աճում են քարտուղարության աշխատանքի քաղաքականացման, որոշումների կայացման մեխանիզմների բյուրոկրատացման, բյուջեի ոչ արդյունավետ ծախսման, պետությունների ներքին գործերին միջամտության և նեոլիբերալ օրակարգի առաջմղման միտումները։ Ակնհայտ է մի շարք պետությունների՝ ՄԱԿ-ն օգտագործելու անհագ ձգտումը ոչ թե հավաքական լուծումներ գտնելու, այլ բացառապես սեփական նեղ շահերն առաջ մղելու նպատակով։ Արդյունքում լրջորեն տուժում են կազմակերպության հեղինակությունն ու արդյունավետությունը»,- նշել է դիվանագետը։

«Մենք կշարունակենք ամեն կերպ նպաստել ՄԱԿ-ի հեղինակության և դիրքերի լիարժեք վերականգնմանը, որպեսզի կազմակերպության կառուցողական ներուժը լիովին բացահայտվի»,- հայտարարել է նա։

ՄԱԿ-ը 2017 թվականից ղեկավարող Անտոնիու Գուտերեշի լիազորությունների ժամկետն ավարտվում է 2026 թվականի դեկտեմբերի 31-ին։ Անվտանգության խորհրդի անդամներն ընտրում են թեկնածուին, որին կառաջարկեն համաշխարհային կազմակերպության ղեկավարի պաշտոնում։ Դրանից հետո ՄԱԿ-ի Գլխավոր ասամբլեան քվեարկություն կանցկացնի, որի արդյունքում պաշտոնապես կընտրվի նոր գլխավոր քարտուղարը։

Ինչպես ավելի վաղ նշել էր ՌԴ արտաքին գործերի նախարարի տեղակալ Ալեքսանդր Ալիմովը, Մոսկվան նախապատվություն չի տալիս գլխավոր քարտուղարի պաշտոնի որևէ թեկնածուի։ Նրա խոսքով՝ կարևորն այն է, որ թեկնածուն համապատասխանի արհեստավարժության և անաչառության չափանիշներին։

ՄԱԿ-ի օրը նշվում է հոկտեմբերի 24-ին։