Գուցե դուդուկի մի ելևէջով մեկին հայ պահես․ Մոսկվայում կայացել է «Հաբրբան» հայկական ազգային նվագարանների մրցութ-փառատոնը (լուսանկարներ)

Մոսկվայում կայացել է «Հաբրբան» հայկական ազգային նվագարանների մրցութ-փառատոնը։ Նախագծի հեղինակը «Հայորդիք» երգ ու պարի համույթի գեղարվեստական եղեկավար, «Հայորդիք» մշակութային կենտրոնի ղեկավար Անահիտ Սարգսյանն է։

«Հաբրբանը» կազմված է մի քանի էտապներից՝ ցուցահանդես-վաճառք, ձեռքի աշխատանքներ, տարազների ցուցադրություն, ազգային նվագարանների մրցույթ, գալա-համերգ։

ArmRus.info-ի հետ բացառիկ հարցազրույցում փառատոնի հեղինակ Անահիտ Սարգսյանը նշեց, որ մինչ այդ, տարիներ շարունակ շատ հաջող էին անցնում «Հայորդիքի» պարի փառատոնները, բայց ինչ-որ բան պակասում էր, որոշել են հերթական պարի փառատոնին՝ մարտ ամսին, փորձնական ներառել նաև նոր նախագիծը՝ «Հաբրբանը», որը հաջողություն է ունեցել։

«Այս անգամ արդեն՝ հոկտեմբերի 18-ին հայկական ազգային նվագարանների մրցութ-փառատոն կազմակերպեցինք, որպեսզի մեր ազգային նվագարաններն ապրեն, գոյատևեն, որովհետև մեռնում են, այսպես ասած։ Երեխաները չեն տիրապետում, վարպետները չգիտեն արդեն՝ ում սովորեցնեն։ Փառատոնը եղավ, որպեսզի նոր շունչ տանք այդ նվագարաններին, և դա երեկ էր»,-նշեց փառատոնի հեղինակը։

Նա պարզաբանեց նաև, որ «Հաբրբանը» կոմիտասյան ստեղծագործության վերնագիրն է, որը նշանակում է միացիր մեզ․ «Հրավեր է, որ ես երգում եմ, ես պարում եմ, արի, միացիր, պատասխանն է ՝ ջանե ջան, ջան ղուրբան։ Դա մեր կոմիտասյան տարբերակից ոգեշնչված անվանում է»։

Ժյուրիի կազմում 4 մասնագետ է ընդգրկվել՝ լարային, փողային, հարվածային ուղղվածությամբ և մեկ բարձր երաժշտական ճաշակ ունեցող անձ։ Ներկա են եղել նաև Ռուսաստանի Հայերի միության փոխնախագահ Ապետ Տապալցյանը, ՌԴ տարբեր քաղաքներից հյուրեր։

«Հայաստանից հրավիրել ենք «Վահագն» դհոլահարների անսամբլի գեղարվեստական ղեկավարին, մարդ, ով առաջին անգամ նոտայագրել է դհոլը։ Արազ Օրդինյանի մասին է խոսքը։ Հրավիրված է եղել «Արարատ բենդ»-ի գեղարվեստական ղեկավար, քանոնահարուհի Նարինե Մալխասյանը, լիբանանահայ Սերոժ Բաղդասարյանը, իսկ ժյուրիի նախագահը ՀՀ ժողովրդական արտիստ Գևորգ Դաբաղյանն էր»,-նշեց Անահիտ Սարգսյանը։

Նրա խոսքով՝ այս փառատոնները երեխաների դաստիարակության, հայկականությունը պահպանելու նպատակ ունի։

«Այս փառատոնները նրա համար են, որ գաջեթներից, հեռախոսներից կտրվեն երեխաները, մենակ այդ կոճակները սեղմելով չէ։ Եթե ինչ-ոչ գործիքի ես տիրապետում, գուցե դուդուկի մի ելևէջով մեկին հայ պահես, մենք աշխարհասփյուռ ենք, և կարծես 100 տարին մեկ մեր ճակատագիրը կրկնվում է»,-մտահոգություններով կիսվեց «Հայորդիք» մշակութային կենտրոնի ղեկավարը։

Նա կարծում է, որ օտար հողում հատկապես երեխաներին պետք է բացատրել, ներշնչել, որ հայ լինելով պետք է հպարտանալ։

«Մենք պետք է բացատրենք, որ մենք ունենք Նարեկացի, մենք ունենք Մաշտոց, ունենք Կոմիտաս ու մեր բոլոր մյուս մեծերը։ Այսիքն՝ երեխան հայ պարին պիտի մոտ լինի, հայ երգին մոտ լինի, հայոց լեզվին մոտ լինի, որ ինքն այս ամբողջն ընկալի, հասկանա ու  իսկապես հպարտանա իր պատմությամբ, ազգությամբ և մեր գոհարները ներկայացնի։ Անհրաժեշտ է ոչ միայն խոսքով հպարտանալ, այլ արյան կանչով։ Միայն այս մոտեցմամբ իրենք հայրենասեր կլինեն»,-եզրափակեց Անահիտ Սարգսյանը։

Այս թեմայով Հայ-իրանական սահմանին շուտով ազգային պարկ կստեղծվի. ԻԻՀ փոխնախագահ. «Sputnik Արմենիա» Փաշինյանն ու Ալիևը հայտնվել են Թուրքմենստանում ազգային ուտեստների փառատոնում