Ժաննա Անդրեասյանը շրջել է COP17-ի «Կանաչ գոտու» տաղավարներում

Հոկտեմբերի 19–30-ը Կարեն Դեմիրճյանի անվան մարզահամերգային համալիրում COP17-ի «Կանաչ գոտում» ԿԳՄՍ նախարարությունը ևս ներկայացված է առանձին տաղավարով։

Համակարգի կազմակերպությունների մասնակցությամբ հանրության համար անցկացվում են կրթական, մշակութային, երիտասարդական և սպորտային միջոցառումներ։

Այսօր ԿԳՄՍ նախարար Ժաննա Անդրեասյանը և նախարարի տեղակալ Աննա Բաբաջանյանն այցելել են մարզահամերգային համալիր, շրջել տաղավարներում, ծանոթացել նախագծերին:
ԿԳՄՍՆ տաղավարում այսօր ներկայացվում է հանրակրթության ոլորտը:

«Այբ» դպրոցի աշակերտները նախարարին են ներկայացրել «Գաղափարից՝ կանաչ ազդեցություն․ նախագծային ուսուցումը հանուն բնության և կայուն ապագայի» նախագիծը, իսկ Կրթության զարգացման և նորարարությունների ազգային կենտրոնը՝ ՅՈՒՆԵՍԿՕ-ի ասոցացված դպրոցների աշխատանքները՝ «Կլիմայական արկղիկ» ծրագիրը՝ սովորողների մասնակցությամբ:

Ըստ նախարարի, քանի որ այս շրջանում դպրոցական արձակուրդներ են, աշակերտների անելիքները պետք է կենտրոնանան COP17-ի «Կանաչ գոտում» գործող թեմատիկ տաղավարներում ներկայացվող ծրագրերի ուղղությամբ:

Խրախուսելով տաղավարներում ներկա աշակերտներին՝ ԿԳՄՍ նախարարը նշել է, որ նրանց կատարած նախագծային աշխատանքները, այսպիսով, ավելի տեսանելի են դառնում ոչ միայն հայ, այլև միջազգային հանրության համար, ինչը աշակերտների համար լավ մոտիվացիա է՝ հանդես գալու նոր նախագծերով։