ՀՀ Կարմիր գրքում գրանցված բեզոարյան այծեր քաղաքացու տանը

ՀՀ Արմավիրի մարզի Ծաղկունք գյուղի բնակչի տան բակի փակ շինությունում հայտնաբերվել են ՀՀ Կարմիր գրքում գրանցված բեզոարյան այծի՝ մոտ 4–5 ամսական երկու առանձնյակներ։ Քաղաքացու հավաստմամբ, կենդանիներն իրեն նվիրել են։
Հոկտեմբերի 15-ին այծերն առգրավվել և տեղափոխվել են Կենդանաբանության և հիդրոէկոլոգիայի գիտական կենտրոն՝ հետագա խնամքն ապահովելու նպատակով։
Կենդանական աշխարհին պատճառված վնասը գնահատվել է 3 մլն դրամ։
Տեսչական մարմինը հանցագործության առերևույթ հատկանիշների վերաբերյալ հաղորդում է ներկայացրել Քննչական կոմիտե։
ԲԸՏՄ-ի հաղորդագրությունը ստորև․

«Բնապահպանության և ընդերքի տեսչական մարմինը ՀՀ ՆԳՆ ոստիկանությունից ս.թ. հոկտեմբերի 15-ին տեղեկատվություն է ստացել Արմավիրի մարզի Ծաղկունք գյուղում ապօրինի պահվող բեզոարյան այծերի վերաբերյալ։ Տեսչական մարմնի կողմից հարուցված վարչական վարույթի շրջանակում պարզվել է, որ Ծաղկունք գյուղի բնակիչ Բ․Ս․-ն իր տան բակի փակ շինությունում պահում է ՀՀ Կարմիր գրքում գրանցված բեզոարյան այծի՝ մոտ 4–5 ամսական երկու առանձնյակ։ Վերջիններիս, ըստ քաղաքացու ներկայացրած տեղեկությունների, իրեն են փոխանցել որպես նվեր։ Հոկտեմբերի 15-ին բեզոարյան այծի 1 արու և 1 էգ առանձնյակներն առգրավվել և տեղափոխվել են Կենդանաբանության և հիդրոէկոլոգիայի գիտական կենտրոնի հայ-ռուսական համատեղ փորձարարական կենտրոն՝ կարանտինային գոտում տեղակայելու և հետագա խնամքն ապահովելու նպատակով։ Կենդանական աշխարհին պատճառված վնասի չափը հաշվարկվել է 3.000.000 դրամ։ Արձանագրված փաստական տվյալները և դրանցում առերևույթ հանցագործության հատկանիշների առկայությունը հաշվի առնելով՝ Բնապահպանության և ընդերքի տեսչական մարմինը հաղորդում է ներկայացրել ՀՀ քննչական կոմիտե»,- ասաված է հաղորդագրության մեջ։