«Ռոսատոմը» կսկսի լողացող ԱԷԿ-ներից էլեկտրաէներգիա արտահանել Ինդոնեզիա

Ռուսական «Ռոսատոմ» պետական կորպորացիան կսկսի էլեկտրաէներգիա արտահանել իր լողացող ատոմային էներգաբլոկներից: Այդ մասին համաձայնագիրը, ինչպես հաղորդում է «Ռոսատոմի» «Ատոմ մեդիա» պարբերականը, ինդոնեզական «PT Pembangkit Listrik Nuklir» ընկերության հետ կնքվել է Մոսկվայում ընթացող Ռուսական էներգետիկ շաբաթվա շրջանակում:

«Ռոսատոմը» Ինդոնեզիայի կղզիներից մեկը կուղարկի 100-ական մեգավատ հզորությամբ երկու լողացող էներգաբլոկ: Կողմերի միջև պայմանագրի ուժի մեջ մտնելուց հետո կսկսվի նավերի առաքումը նշանակման վայր և դրանց միացումը Ինդոնեզիայի էլեկտրացանցերին: Գործընթացը պետք է տևի 5 տարի:

«Նշեմ, որ սա լողացող ատոմային էներգաբլոկից էլեկտրաէներգիայի մատակարարման մասին աշխարհում առաջին արտահանման պայմանավորվածությունն է: Համոզված եմ, որ համաշխարհային գործարար համայնքի համար այն վառ օրինակ կդառնա, թե ինչպես պետության համակարգային աջակցությամբ մասնավոր բիզնեսը կարող է ատոմային էներգետիկայում լայնածավալ ենթակառուցվածքային նախագծեր նախաձեռնել»,-հայտարարել է «Ռոսատոմ» պետական կորպորացիայի գլխավոր տնօրեն Ալեքսեյ Լիխաչովը:

Ավելի վաղ «Ռոսատոմը» լողացող ԱԷԿ էր գործարկել Չուկոտկայի Պևեկ ավանի մոտ (բնակչությանը և ոսկու արդյունահանման ձեռնարկություններին ապահովելու համար), ինչից հետո սկսել էր ևս մեկ մոդուլային ԱԷԿ կառուցել Յակուտիայում՝ ոսկու և անագի հանքավայրերի խմբի մոտակայքում:

Լողացող ԱԷԿ-ները կօգտագործվեն նաև Հեռավոր Արևելքում պղնձի արդյունահանման էներգամատակարարման համար: Մայիսի վերջին «Ռոսատոմի» մեքենաշինական գործարաններից մեկն այդ նախագծի համար պատրաստել էր առաջին ռեակտորային կայանքը:

Այս թեմայով «Ռոսատոմը» ՀՀ-ից դրական ազդակներ է ստանում Հայկական ԱԷԿ-ի էներգաբլոկի կառուցման առաջարկի առնչությամբ. Լիխաչով «Ռոսատոմը» Հայաստանին առաջարկել է ՎՎԷՌ-1000 տեխնոլոգիայով նոր ատոմակայանի էներգաբլոկ կառուցել․ Լիխաչով