Նիկոլայ Բորդյուժան առաջարկել է Հայաստանին հեռացնել ՀԱՊԿ֊ից

Օրեր առաջ Հայաստանի արտաքին գործերի նախարար Արարատ Միրզոյանը հայտարարեց, թե չի պատկերացնում Հայաստանի վերադարձը ՀԱՊԿ։ Այս հայտարարությունը Ռուսաստանում վատ նոտայի հղում են ընդունել։

ՀԱՊԿ նախկին գլխավոր քարտուղար Նիկոլայ Բորդյուժան առաջարկել է Հայաստանին հեռացնել կազմակերպությունից։Այս մասին նա հայտարարել է РИА Новости-ին տված հարցազրույցում։

«Հայաստանին պետք է հեռացնել Հավաքական անվտանգության պայմանագրի կազմակերպությունից (ՀԱՊԿ), քանի որ այն չի մասնակցում կազմակերպության աշխատանքներին, բայց միևնույն ժամանակ անհրաժեշտ է նրա հետ համաձայնեցնել բոլոր որոշումները»,- հայտարարել է ՀԱՊԿ նախկին գլխավոր քարտուղար Նիկոլայ Բորդյուժան։

Ներկայումս ՀԱՊԿ կազմում ընդգրկված են Ռուսաստանը, Բելառուսը, Ղազախստանը, Ղրղզստանն ու Տաջիկստանը։

Հայաստանը 2024 թվականին հայտարարել է իր մասնակցության «սառեցման» մասին, թեև կազմակերպության կանոնադրությամբ նման կարգավիճակ նախատեսված չէ, և դադարեցրել է անդամավճարների վճարումը։

«Եթե նրանք կասեցնում են իրենց մասնակցությունը, բայց դուրս չեն գալիս կազմակերպությունից, ապա շարունակում են մնալ ՀԱՊԿ լիիրավ անդամներ։ Իսկ եթե նրանք լիիրավ անդամներ են, նշանակում է բոլոր որոշումները, որոնք ՀԱՊԿ-ում ընդունվում են կոնսենսուսի սկզբունքով, պետք է ընդունվեն հաշվի առնելով նաև նրանց դիրքորոշումը։ Սակայն այսօր այդ դիրքորոշումը, ըստ էության, հակասում է այն ամենին, ինչ կատարվում է ՀԱՊԿ-ում»,- պարզաբանել է Բորդյուժան։

Նրա կարծիքով՝ Հայաստանի համար պատշաճ քայլը կլիներ ամբողջությամբ դուրս գալ ՀԱՊԿ-ից։ Իսկ եթե Երևանը նման որոշում չի կայացնում, ապա կազմակերպությունը պետք է հեռացնի Հայաստանին իր կազմից։

«Ես նրանց կհեռացնեի։ Անդամավճարները չեն վճարում, մասնակցություն չեն ունենում։ Եթե լուրջ մոտեցում ունենային, ապա պարզապես պետք է դուրս գային կազմակերպությունից, եթե լուրջ գործընկերներ են։ Բայց քանի որ նրանց դիրքորոշումը երկակի է, դուրս չենք գա, բայց չենք աշխատի, չենք մասնակցի և չենք ուզում մասնակցել, ապա նրանց պետք է հեռացնել»,- հայտարարել է Բորդյուժան։

Ավելի վաղ ՀԱՊԿ գլխավոր քարտուղար Տաալատբեկ Մասադիկովը հայտնել էր, որ 2026 թվականի նոյեմբերի 11-ին Մոսկվայում կայանալիք ՀԱՊԿ Հավաքական անվտանգության խորհրդի նիստում կարող է բարձրացվել Հայաստանին կազմակերպությունից հեռացնելու հարցը։

Նրա գնահատմամբ Հայաստանը խախտում է ՀԱՊԿ կանոնադրության 20-րդ և 25-րդ հոդվածները։