ԱՄՆ-ն, Հայաստանն ու Ադրբեջանը տեխնիկական խումբ են ստեղծել «Թրամփի ուղին» գործարկելու համար

ԱՄՆ-ն, Հայաստանն ու Ադրբեջանը տեխնիկական խումբ են ստեղծել «Թրամփի ուղին» գործարկելու համար։

Դրանում ընդգրկված երեք երկրների ներկայացուցիչները կզբաղվեն տրանսպորտային և էներգետիկ նախագծի դետալների մշակմամբ։ Դրա համար կձևավորվեն նաև երկու պրոֆիլային ենթախմբեր՝ տրանսպորտի և էլեկտրաէներգիայի հարցերով։ Դրանց աշխատանքը նպատակ ունի լուծումներ գտնել բարդ տեխնիկական խնդիրներին և անցում ապահովել ծրագրի իրականացման հաջորդ փուլերին, այդ թվում՝ TRIPP-ի կապակցմանը տարածաշրջանային այլ ենթակառուցվածքների հետ, այս մասին հայտնում են ԱՄՆ Պետդեպարտամենտից։

Մեկնարկը տվել են ԱՄՆ պետքարտուղարի Եվրոպայի և Եվրասիայի հարցերով օգնական Բրենդան Խանրահանը, Հայաստանի և Ադրբեջանի փոխարտգործնախարար Վահան Կոստանյանը և Էլնուր Մամեդովը: Մասնակիցները հաստատել են երթուղին հնարավորինս շուտ իրականացնելու մտադրությունը։

Եռակողմ ձևաչափը միավորում է երեք երկրների քաղաքականություն մշակողներին և տեխնիկական փորձագետներին՝ տարածաշրջանային կայունության, տնտեսական զարգացման, հաղորդակցությունների փոխկապակցվածության և առևտրի խթանման նպատակով։ Հայտարարության մեջ ընդգծվում է, որ գործընթացը բխում է 2025 թվականի օգոստոսի 8-ին նախագահ Դոնալդ Թրամփի միջնորդությամբ ընդունված խաղաղության գագաթնաժողովի հռչակագրից։

Կողմերը վերահաստատել են TRIPP-ի բոլոր բաղադրիչների հնարավորինս արագ գործարկման իրենց հանձնառությունը։

Հայաստանի արտաքին գործերի և միջազգային առևտրի նախարար Արարատ Միրզոյանն ավելի վաղ հայտարարել էր, որ նախագծի շրջանակում շինարարական աշխատանքները կարող են մեկնարկել 2027 թվականի սկզբին։