Նկարիչը, որն իրեն անմահացրել է Պոմպեյի վերջին օրը

 Կառլ Բրյուլովի «Պոմպեյի վերջին օրը» կտավը համաշխարհային արվեստի գլուխգործոց է։ Քչերը գիտեն ամենահետաքրքիր մանրամասներից մեկը `նկարը ներառում է նկարչի ինքնադիմանկարը։ Կտավի ձախ հատվածում, փրկվելու փորձ անող մարդկանց բազմության մեջ, պատկերված է մի երիտասարդ տղամարդ՝ գլխին նկարչական պարագաների արկղ, ձեռքին՝ վրձիններ։ Դա հենց Կառլ Բրյուլովն է, ինքն իրեն պատկերած սեփական գլուխգործոցում։ Այս դետալը պատահական չէ։ Նկարիչը կարծես իրեն տեղավորում է պատմության ամենաողբերգական պահի մեջ,  ոչ թե որպես սովորական դիտորդ, այլ որպես մի մարդ, ով ներկա է մարդկային քաղաքակրթության կործանմանը և փորձում է այն հավերժացնել արվեստի միջոցով։ Այստեղ մի հետաքրքիր հակադրություն կա․ շուրջբոլորը մարդիկ պայքարում են իրենց կյանքի համար, իսկ նկարիչն իր հետ տանում է այն, ինչով կարող է պահպանել այդ պահը՝ իր արվեստը, այն ինչը նա կարծում է ամենաթանկը։

Բրյուլովը կարծես ինքն իրեն հարց է տալիս՝ ի՞նչ կարող է անել արվեստագետը, երբ աշխարհը փլուզվում է։ Նրա պատասխանը մնացել է կտավի վրա, դառնալով անմահության յուրօրինակ խորհրդանիշ։