Ալիևն ու Էրդողանը որոշում են Հայաստանի ապագան առանց Հայաստանի

Նոյեմբերի 8-ին Շուշիում հանդիպել են Թուրքիայի և Ադրբեջանի նախագահներ Ռեջեփ Թայիփ Էրդողանն ու Իլհամ Ալիևը։ Հանդիպման ընթացքում քննարկվել են տարածաշրջանային խաղաղությունը, տրանսպորտային հաղորդակցությունները և Զանգեզուրի միջանցքի հարցը։ 

Զանգեզուրի միջանցքի հարցը քննարկել են առանց Զանգեզուրի տիրոջ, այսինքն առանց հայկական կողմի։ Հատկանշական է, որ երկու առաջնորդները Հայաստանի հետ կապված հարցերը քննարկում են այնպես, կարծես Հայաստանի փոխարեն իրենք պետք է որոշեն, թե ինչ ճանապարհներով պետք է անցնեն հաղորդակցությունները, ինչ պայմաններով պետք է կարգավորվեն հարաբերությունները և ինչ քայլերի պետք է գնա Երևանը։

Էրդողանը վերահաստատում է Բաքվին աջակցելու Անկարայի պատրաստակամությունը, իսկ Ալիևը խոսում է Հայաստանի հետ խաղաղության գործընթացի ակնկալիքների մասին։

Ստացվում է մի իրավիճակ, երբ երկու պետությունների ղեկավարները, Հայաստանի սուբյեկտայնությունն անտեսելով, իրենց վերապահում են որոշողի և պայմաններ թելադրողի դեր։ Հայաստանը քննարկման առարկա է, իսկ որոշումների սեղանի շուրջ բացակա։

Եվ սա է ամենամտահոգիչը․ երբ Անկարան ու Բաքուն Հայաստանի տարածքի, հաղորդակցությունների և ապագա քաղաքական քայլերի մասին խոսում են այնպես, կարծես Հայաստանից միայն համաձայնություն ստանալն է մնացել ու թվում է Մեղրիի հարցում արդեն ամեն ինչ պարզ է,մնացել են դետալներ։ 

Արմինե Մելքոնյան